Hardanger får Landsfestivalen i gammaldansmusikk 2019
For fyrste gong skal Landsfestivalen i gammaldansmusikk verte arrangert i Hordaland, og det i vakre Kinsarvik i Hardanger. Hardanger spelemannslag er vertskap for Landsfestivalen 2019, som vert arrangert helga 7.-11. august 2019.
Styret i FolkOrg har vedteke å tildela Hardanger spelemannslag Landsfestivalen i gammaldansmusikk i 2019. Dette er fyrste gongen Landsfestivalen vert arrangert i Hordaland, til tross for sterke runddanstradisjonar i fylket i lang tid. Hardanger er sjølv kjent for sitt særmerkte valsaspel, som blant anna har vorte halde i hevd av spelemenn som Nils Tjoflot, Per Bulko, Halldor Meland, Anders Kjerland, Ingeleiv Kjerland Kvammen og Ola Kvammen.
Festivalarenaen vert lagt til Kinsarvik i Ullensvang kommune. Kinsarvik har i mange år vore arena for Blømingsfestivalen, den årlege vestlandsmeisterskapen i gammaldansmusikk.
Magne Velure er leiar for hovudnemna som skal arrangera, og Øystein Velure er tevlingsleiar.
Les meir på FolkOrg sine nettsider.
Foto: Per Svein Reed/FolkOrg