Vellukka Hordamønstring
Det var Bergen ungdomslag Ervingen som var arrangør då Hordamønstringa igjen vart arrangert i Gimle, laurdag 12. mars. Heile 152 enkeltdeltakarar fordelt på 62 startnummer deltok i mønstringa.
Mønstringa hadde som fokus å vise fram dei unge utøvarane innan folkemusikk og folkedans i fylket. Dagen vart opna med ein sjokoladekappleik, og der var det 35 unge, lovande som ivrig deltok. Etterpå vart det tevla i ulike instrument, vokal og dans, både solo og i lag/grupper. Til forskjell frå det ein er vane med frå kappleik, så var det ein ung seniorklasse for dei mellom 18-26 år i tillegg til juniorklassen. Det var ei god deltaking frå eit vidt geografisk område, deriblant frå Voss, Hardanger, Osterøy og Bergensområdet.
Dommarane for anledninga var:
- Åse Teigland: hardingfele, gruppespel, lagspel og sjokoladekappleik
- Eva-Marie Toppe: hardingfele, vokal, gruppespel, lagspel og sjokoladekappleik
- Knut Kjerland: hardingfele, toradar, gruppespel og lagspel
- Sindre Fotland: toradar og sjokoladekappleik
- Steffen Eide: vokal og toradar
- Gunn Inger Sture: lagdans, pardans, laus/halling og sjokoladekappleik
- Stig Indrebø: lagdans, pardans, laus/halling og vokal
- Sverre Sundvor: lagdans, pardans og laus/halling
Etter mønstringa vart det helde tradisjonell familiefolkedans i Gimle, før ein seinare på kvelden hadde dansekveld med dansespel frå Osterøy spel- og dansarlag, Håkon Høgemo og Bul Ervingen sitt eige spelemannslag, Audhilds.